ماحبتش غيرها
برغم السنين اللي فاتت عليا
بيفضل حنين مني ليها ف عنيا
وتفضل كآن البنات بعد منها
نسخ باهتة منها
وكل الشموس اللي تبعت غيابها
بتنعي انسحابها
كآن الشوارع عجين لما مرت
فنحتت اثرها
وحفظت كلامها وخوفها وهزارها
ومشيت جماعه مامشيتش مفرد
عشان غاب معاها مساها ونهارها
بتسألني عنها
برودة ايديا ورعشة سلامي
ويسألني عنها سكوتي وكلامي
وجندي الاشاره
ويسألني قلبي وكلبي ومرايتي
وتسألني ساعتي ف معاد الزيارة
بتوحشني زي العيال ف المدارس لعين امهاتهم
وتوحشني زي ارتباط الملابس بايد شماعاتهم
وسايباني زي اللي ماتوا وفضلوا بيمشوا ف حياتهم
تشم القلوب كل يوم زهر فايح
وتتبقى وردة ويفضل عبيرها
ماحبتش غيرها
وليها مكانه مخليه قلبي بيسلك دروبها
خدتني لدرجة تخليني اشوف المزايا ف عيوبها
وصوتها
وايه زي صوتها
نزول المطر فوق خشب بيت قديم
نعومة نجاة وبحة حليم
وضحكتها تشبه دخول النسيم
على ارض طالها الخريف من زمن
ف يوم ما اتقابلنا
ماكنتش باشوف الحياه ليها معنى
وحسيت كإني عارفها لزمن
كإن النصيب كان بعَدنا وجمعنا
وسددت تمن وقبضت التمن
بسلم عليها كاني سايبها ف غربة ورجعت
وسكتت ف لحظتها لكن سمعت
وغمضت عيني عشان املى روحي
قمر غاب ف ليلكم ونور سطوحي
وصالحتني كل السنين اللي فاتت
مجرد ماعدت
وقفنا ف مكاننا وخطاوينا مدت
وفجأة انفجر سيل طويل م الأغاني
كل ده كان ليه
ياللي بتسأل عن الحياة
بعيد عنك
كبر الغرام
بهواك
حيرت قلبي معاك
وقولت هاقدر ايوم انساك
وكل ما انساها افتكرها
ماحبتش غيرها
ماحستش عمري باحساس مشابه تجاه آى واحدة
كآن الغرام اللي مكتوبلي كامل
خرج غصب عني وعلى دفعه واحدة
كبر فيا معنى
وصار بيننا لعنه
بدات معانا ف يوم ما اجتمعنا
وانا كنت اصغر سنين كده من
ماكنتش مامن ليغدر زماني
وعايش مامن وواقف مكاني
وشارد ف لون الحياة البرتقاني
وتارك بيبان الغياب مفتوحين
ففاجئتني ضربة على غفله مني
وسلمت راية ف أول كمين
وفاتت سنين
واديني كآن اللقا من ثواني
لكني بقيت للأسف حد تاني
خانتني الظروف واتسجنت ف غيابها
ولسّاني ايد ع الاكر عند بابها
وبعد اما كنا شباب في البداية
كبرنا سنين جوه شرح الروايه
واصبح مابيننا جبال من جليد
بلادها بعيد
وارضي ملاها الحداد والحديد
وتجعيدي مرت شقوق الغيطان جوهان طمي الوريد
وأصبحت اكبر
وأصبحت أعدي الطريق ف الإشارة
باتقل هدومي وبلبس كوفيّه
واحس باوجعها واوجاعكوا فيّا
وأصبحت اعقل
واهدى وأتقل
وهي كمان حاجه انطفت
وعاشت ظروف متعبه واختفِت
لكن لسه نفس الصبيه الجميله
وصاحبة ليالي الغرام الطويلة
ولسه عيون ممكنه ومستحيله
وست البنات كلهن ف عنيا
ومهما ايدين ناعمه مسكت ايديا
ومهما عيوني ثبتتني ف مكاني
هتفضل رجولتي وطفولتي عشانها
مايملاش مكانها ف يوم حد تاني
ولا واحدة تربط مصيري بمصيرها
ولا واحدة تربط مصيرها بمصيري
ماحبتش غيرها
ومايأسش ابدا
ولو حتى قالوا الحكايه ف اخرها
ولو صوت صحابي ف داني محاصرني
ولو طول غيابها خانقني وعاصرني
ولو حتى عدت سنين تانية بيننا
هاقول انه وارد
وجايز وممكن
وامني خيالي باجمل نهاية
وهى معايا
وجايه تعوضني لحظة بكاها بلحظة بكايا
وراجعة بكل الورود اللي دبلت
والاقيها قبلت تكمل معايا
ولو ساعة واحدة
ولو حتى نظرة
هاحس اني مرة مشيت وانتصرت
واني جنيت قد لما انتظرت
فسايب مساحة ف بيتي لخيالها
وسايب مساحة ف قلبي لعيالها
وسايب اوضتنا ترتبها هي
وسايب مخدة زيادة وكوفيه
ومختار اضاءة تلائم عنيها
وعامل حسابي عليا وعليها
واقول بكره اجمل وهاقدر وهاكسب
رهاني ف حاجات كان خيالي خسرها
ماحبِتش وافخر بكونها ف حياتي
واني ف حياتي ماحبتش غيرها
Comments
Post a Comment