بلاش اكدب على نفسي
ولا ابرر ولا اصور لروحي الوهم
هيفرق ايه سبب موتي يكون برصاصه ولا بسهم؟
مراية الحب مش عميا
مراية الحب كدابة
وكان لازم تغيب عني ياسايبه يا اما متسابه
وكان لازم بنفسي احس
كان لازم بعيني اشوف
اقابل وشها البارد
بقلبي الشارد الملهوف
واغنيلها
واعيش ليلها
واقدّف مركبي ف نيلها
واراهن بالورق كله على اخر رقم كسبان
دخلت علاقة وانا مستور
وخارج منها وانا عريان
وخارج منها شاكك
ومش شايل لحد أمان
ماحبتنيش
برغم اني وكتاب الله ماقصرتش
ويوم ماقالتلي عايزه اعرف ما أنكرتش
ويوم ماقالتلي زعلانه مابررتش
معاها كنت انا التاني وابديها
بنقص من حياتي حاجات وبديها
ولما تمدلي ايديها
امد ايديا ماسحبهاش
ماحبتنيش وحبيتها
ودايرة تقول ماحبتهاش
غريبة القلب وعمايله
ده انا لو كنت بعاديني ماكنتش هامشي ناحيتها
ولو جوايا بكرهني ماكنتش برضه حبيتها
مافيش عندي سبب واحد يبرر نظرتي ليها
رسمت سيناريو جوايا وصدقته
وقولت لنفسي بتحبك وعينها عليك
ياواد قرّب
ياواد جرّب
دي لسه ف دنيتك داخله وله خيالها متغّرب
لحد ما مرت الأيام وانا بخسر ف كل قرار
وعشت حياتي بـ اتنازل وتغلط والتمس اعذار كنت
حمار
مفكر في لجل الحب نفرّط عادي ف كرامة
اشوف نمرتها ف موبايلي
احس شعور غريب جايلي
وصوتي يتقلب اهدى بوتوّل ف الكلام وارغي
وكل كلامها كان منهج مذاكره حتى تمغي
وشايف انها كوني وشمسي وضلتي وناسي
وبتأسف لاكون غلطان ف حاجه عملها وناسي
اكلمها عن الحاضر وعن بكره
وعن بيتنا
وهي كلامها كان اخره خلاص وتمام
صباح الخير
مساء الخير
ويلا سلام
بطلّع منها الكلمة الروح الروح
باقول وايه يعني في ناس بتحس مش بتبوح
لقيت افعالها زي كلامها بالواحدة
وبمشي ليها ميت خطوة
ماتمشيش ليا ولا واحدة أنا
زعلان على نفسي
عشان شكّيت كده ف نَفسي
ودوست عليا بالجامد عشان واحدة
ماحبتنيش أنا
يمكن فراغ عادي
بديل الرعد
بس ليها
ايدين ويمكن كنت توصل
ونقطه بُعد لعلاقتين
ويمكن كنت بالنسبالها تكفيره
وعرفتني تسدد دين
ويمكن أي شيء تاني اكيد عارفاه
ماسألتشِ وهي بترتكب حبي
وايه ذنبه اني ابقى معاه؟
ماحستش بذنب ازاي
وعاشت تتهم فيا
وترميني بتهم ظالمة
بتطلب مني اطفى النور وتتخانق عشان ضلمه
وطول الوقت بتشكك
وبتفاوض
وبتخانق
وبتراود
وبتعاير
وبتندم
كاني باجري وانا واقف
وفاكر نفسي هاتقدم
واديني جريت لحد ماشوفت وضعي ازاي
ماحبتنيش
وسايباني شعور ميت
بشوف ايه ف الحياه يتعاش
ب اعد خسايري وانا خارج
دموعي وخوفي ومشاكلي
وايامي اللي راحوا بلاش
لكني باقول انا راضي
واحط الجملة دي قصادي
"ده ذنب وجايلي م الماضي بدعوة واحدة مابتنساش"
Comments
Post a Comment