تقابليني
كآنك فيلم خمسيني
كآنك وردة في البدلة بيرويها مطر عيني
كآنك أرض
كاني ف حضرتك بابقى روائي لا يمل السرد
أميل لك بس مابملك
اشيلك عمري ما أشيل لك
واغازلك شعر واغزل لك
ضفاير شكي ويقيني
تقابليني
واطل ف عينك استشهد
يامزيكا بتتنهد
شموسك كيف بتتجدد وضلك طيف مغطّيني
أراقبك لما بتشاوري ف وقت ماتوصفي حاجه
وعارفك لما بتناورى عشان تلهينى عن حاجه
وامتى بتبقي محتاجه اكونلك حضن ان يلزم
واقولك امتى تحديدا بأن غرامنا لن يهزم
وعارف امتى بتبُصي بعين من خوف
وصوتك وانتي تعبانه وشايله الهم
يا اقرب من فصيلة الدم
ماكونش ازاي بقا مهتم
بواحدة رضاها يحييني؟
تقابليني
واراقب شعرك المقصوص
كآن الليل نقص ساعتين
جميل والله ولايقلك
وفاتح للخيال طريقين
وطول عمرك بتختاري الهدوم بمزاج
وعارفة تنقي برفانك كانه انتي
يا واخده العقل من ايده كانه ابنك
باقولك ايه
خرجتي من على واحد خروج زهرة
خروج مزيكا من (راجح داوود) مثلا
بكل مافيكي من ستات فاجئتيني
فتحتي الحلم والتأويل وسيبتيني
مهرج والسما سيما
وطايش والطريق مراجيح
تقول امي:
بقالك فترة مش مظبوط
تبان قلقان لكن مبسوط
ومتوتر كده وخايف
ومش فاهماك
تعبت معاك
تكونش ياواد عشقت جديد!
تقول امي ف وصف العيد
(ياريتك جيتنا من بدري)
واظن الوصف ده ينفع يكون عنك
ياريتك جيتي من بدري وخدتي الروح وخدتيني
تقابليني
بدون أسباب
زكاة عن ضحكتك مثلا
كفالة طفل نصه يتيم
هنتكلم عن الدنيا
وعن حبي لشهر اتنين
وممكن اقول اسامي صحابي بالترتيب
وتحكيلي اللي ف عن القطة عيونك
ولون اوضتك
هاقولك اني متورط بعصبيتي
باحب احمد زكي جدا
موسيقى نهاية الكيت كات
وممكن تحكي عن والدك
وعن اخر خطوط الموضه ف العالم
وعن حلمك تعيشي في ارض محدوفة وبيت واسع
هنتكلم ف أي كلام
وأي كلام فذاتة كلام
كلام تافه بدون ترتيب
مسافة وقت يسمحلي اكون جنبك لاطول وقت
وحشتينى
ووحشتي القلب من دلوقت
واحط ايديا علي قلبي واراقب مهرجان الصيف
ابطل حب امتى وكيف
وحبك كيف ف شراييني!
تقابليني
عشان محتاج اقابلك موت
فيه عندي حوالي (ولا موضوع) احب افتح كلام فيهم
اصالح عمري ف وجودك
وانقح نفسي نفسي الأخطاء على حدودك
وعارف اني شيء بائس
واني مصاب بمتلازمة (وحشتيني)
وعارف برضه اني كسول
بسيب كل الحاجات ع الأرض
وريحتي كلها دخان
وعارف برضه انى كمان بشجع نادي مش حباه
ياستي حياة ولازم نختلف فيها
يا أجمل حاجه ف الدنيا ابتليت بيها
واطيب ركن ف الاوضه اللي جوايا
ف قلبي فيه كذا حكايه
وحابب احكي ف ساعديني
تقابليني !!
Comments
Post a Comment